前曼聯兵重生　巴甲射入超級罰球

曼聯青訓產品安達斯彭利拿，8月底被外借到巴甲法林明高，結果呢位25歲中場獲得重生，喺巴西上陣11場攻入3球，日前主場對青年人攻入超靚罰球，獲當地球評大讚好波。
先講呢個罰球，偏左路離門35碼，彭利拿竟然施展大力金剛腿直接起腳施射，皮球越過人牆從高墮落，直飛遠柱死角冇得救，原來呢個入波，更係法林明高3年4個月以來首個罰球直接射入。
祖籍巴西嘅彭利拿在曼聯出道，但撞正球隊低潮，經歷動蕩，一直發展唔如意，近年多次被外借，上季外借到拉素，上陣33場入1球，今季返回巴甲終於踢出爭氣波，短短兩個月交出3入球1助攻表現，現時法林明高排第2，挑戰明尼路嘅榜首位置，唔通唔踢曼聯真係好波啲？