普巴理得你　續約人工要同C朗睇齊

曼聯內部立立亂，保羅普巴實行趁火打劫，佢同曼聯續約談判僵持不下，法國傳媒爆料，普巴提出人工加到同基斯坦奴朗拿度一樣，就會續約。
普巴現時周薪29萬鎊，而C朗就接近50萬鎊，普巴想同C朗睇齊自然有佢嘅計算，問題係曼聯依家踢到咁嘅樣，今季爭冠機會渺茫，歐聯資格都好忟水，佢仲好意思開口先好嘢。
法國《隊報》報道，普巴對於自己去留未有定案，並不抗拒續約，分析指普巴季初一度有好表現，頭幾場頻頻交出助攻，現時與穆罕默德沙拿同以7個助攻，排喺助攻榜榜首，不過近幾場表現低迷，續約談判無甚發言權。反觀C朗，12場入9球，包括歐聯2球絕殺反勝，收得貴係應該嘅。
不過普巴嘅態度係理得你，曼聯咩成績唔關我事，堅持自己要收球王級價錢，之後就要睇曼聯管理層點處理。