英超下季賽程分兩截　聖誕快車緊接世盃決賽

英超聯賽會周五(12日)公布2022/23球季賽程，由於卡塔爾世界盃破天荒改喺冬天舉行，令歐洲球壇秩序被打亂，英超下季亦被逼分為「上、下半場」。球季踢到11月中就要「休息」超過6個星期，世盃決賽後1個星期即刻重開，趕踢「聖誕快車」！
卡塔爾世界盃喺明年11月21日揭幕，12月18日進行決賽，為遷就賽程，英超下季會提前喺8月6日開鑼，喺11月14日前完成16輪賽事後「讓路」世界盃。當世盃決賽上演後1個星期，英超喺12月26日「拆禮物日」重開，到5月28日舉行煞科戰。
卡塔爾世界盃搞亂歐洲球壇秩序，唔少球會都非常不滿，對於國際足協計劃將4年一度世界盃改為2度一次，英超20間球會亦發表聯合聲明，表明反對呢項改革方案。